Afasia

Kiko ta afasia Tur hende ta usa idioma. Papia, haña e palabranan apropiá, komprondé, lesa, skirbi i hasi seña ta partinan di nos uso di idioma. Ora pa motibu di un leshon selebral ku un òf mas parti di uso di abla no ta funshoná, nos ta yama esaki afasia.

Afasie, A (=no) fasia (=abla) ta nifiká ku un hende no por bisa mas loke e ke. E no por usa idioma mas. Banda di afasia paralisashon tambe por tuma lugá òf problemanan por surgi ku: - aktuashonnan konsiente - tuma nota di kosnan rònt di bo - konsentrashon, tuma inisiativa, i memoria.

E hendenan no por hasi dos kos pareu mas. Hopi hende sa eksperenshá frustrashon durante nan vakashon den eksterior, kaminda nan no por splika ku eksaktitut kiko nan ke, òf no por komprondé bon kiko e otro ke. Hasta den teranan ku nos ta kere ku nos por dominá e idioma bon, nos ta ripará esaki por ehèmpel ora nos tin ku bai bishitá un dòkter.

Den teranan kaminda nos ta dominá e idioma ménos bon, nos posibilidatnan pa komuniká ku e habitantenan lokal ta bira mas i mas limitá i hasta no ta logra nos tur biaha di haña e kuminda riba nos tayó ku nos tabatin gana di kome.

Hendenan ku afasia diariamente ta eksperenshá e problemanan aki. Afasia pues ta un defisiensia den idioma. No tin dos hende ku tin afasia ku ta presisamente igual, afasia serka tur hende ta otro. E gravedat i e grandura di e afasia entre otro ta dependé di e lugá i e gravedat di e leshon selebral, e kapasidat anterior di idioma i e hende su personalidat. Tin hende ku afasia por komprondé idioma bon, pero nan tin problema pa haña e palabranan korekto òf problema pa traha e frasenan. Otronan ta papia hopi, pero loke nan ta bisa no ta komprendibel òf ta difísil pa komprondé; e hendenan aki hopi biaha tin problema ku komprondementu di idioma. E kapasidat di idioma di hopi hende ku afasia ta entre e dos ekstremonan akí.

Paga tinu: un hende ku afasia generalmente ta disponé kompletamente di su kapasidat intelektual!

Kasi tur biaha tin algun rekuperashon spontanio di idioma despues ku afasia a surgi. Masha poko òf nunka e rekuperashon ta kompletu. Tòg mayoria biaha tin rekuperashonnan despues di hopi ehersisio, kada biaha purba di nobo i dor di pèrseveransha.

Kon afasia ta surgi Afasia ta surgi dor di un leshon selebral. Un leshon selebral hopi biaha ta wòrdu kousa dor di un malesa di ader. Un malesa asina tambe sa wòrdu yamá, ataka, derame selebral, infarto serebral òf ataka di selebre. Den terminologia médiko e yama CVA. Cerebro (=selebre) Vasculair (=ader) Accident (=aksidente). Otro motibunan kaminda afasia ta surgi ta por ehèmpel un leshon (un herida den e selebro dor di por ehèmpel un aksidente di tráfiko) òf dor di un tumor den selebro. Nos selebro mester di oksígeno i glucosa pa por funshoná. E arianan pa uso di idioma serka hopi hende ta sinta den e parti robes di e selebro. Ora tin un leshon den e aria di idioma aki nos ta papia di afasia.