Agotashon i "Stroke" kousa pa kalor

Sodamentu ta funshona meskos ku aire kondishona natural. Sodo ta evapora for di nos kutis, i e ta freska nos. Nos sistema personal di fria por faya si nos hasi hopi esfuerso riba dianan hopi kayente i humedo. Ora esaki tuma luga e kayente di nos kurpa por subi te na nivelnan peligroso. Esaki por resulta den un agotashon of un "stroke" pa motibu di kayente. Agotashon pa motibu di kayente ta tuma tempu pa desaroya. Likido i salu ta esenshal pa nos salu. Tin hopi adulto i hobenan ku ta soda un kantidat durante ehersisio of otro aktividatnan. Ta importante pa bebe hopi likido prome, durante i despues di ehersisio ora ta hasi kalor. Kon straño ku e por parse, e hendenan ku sa sufri di agotashon pa motibu di kalor, e temperatura di nan kurpa ta abou, normal of djis un tiki haltu.

Sintomanan di agotashon pa motibu di kalor ta:

• kurpa friu, pega-pega i un kara blek

• sodamentu

• fatiga i debilidat

• biramentu di kabes

• dolo di kabes

• biramentu di stoma i tin be sakamentu

• kram den muskulonan

• un pols debil i lihe

Prome asistensha

• Move bai un luga fresku den kas of den sombra

• Kita paña for di bo kurpa

• Tuma likido manera awa fresku of friu (si esaki ta alkansabel pone un telep chikitu di salu den poko awa i bebe esaki tiki-tiki)

• Por usa tambe e bibidanan ku sa usa ora di deporte manera Gatorade etc

• Tuma alimento ku tin salu manera buskuchi di soda ku salu esta si bo salu ta permiti bo usa salu

• Kai drumi den un luga fresku ku tin airu fresku

Sintomanan di stroke (ataka) kousa pa kalor:

• Temperatura hopi haltu

• Kutis kayente seku i kora

• Bo no ta soda

• Bo ta hala rosea profundo i pols ta bati pura, despues ta sigui halamentu di rosea superfisial i pols debil

• Pupilonan di span

• Konfushon, delirio i halusinashon

• Konvulshon

• Perdida di konosementu

Kondishonan di salu kroniko manera diabetis, uso di alkohol i/o sakamentu of diarea por pone mucha i adultonan kore riesgo pa haña un stroke durante weer hopi kayente. Stroke kousa pa kalor serka muchanan no ta solamente debi na e temperatura nan haltu i humedat sino tambe pasombra nan no ta bebe sufisiente awa.