Alzheimer...

Kiko ta e malesa di Alzheimer?

E malesa di Alzheimer ta un malesa di seleber ku ta inkurabel i den kual selnan den diferente parti di e seleber ta stop di funshona i a degenera. Esaki ta e kausa di demensia. E malesa aki a wordu nombra na e dokter Aleman Alois Alzheimer ku den komienso di siglo 20 a deskubri kambionan den e seleber di persona ku a fayese ku demensia. E malesa di Alzheimer ta inkurabel i progresivo. Aunke tin hopi research hasi riba diferente aspekto di e malesa aki ainda e kausa eksakto i un tratamentu kompletu no ta konosi.

Algun sintoma ta ku e persona ta lubida, kambio den personalidat, desorientashon, difikultad ku ekspreshon verbal / uso di idioma. E sintoma di demensia no ta kausa direktamente ku un persona ta fayese, pero indirektamente si esaki ta e kaso. Dor di e daño progresivo den e seleber ta bai experiensia kada biaha mas problema den e funshonamentu tambe di e diferente organonan. Esaki lo por kondusi ku e persona ta fayese.

Mundialmente pero tambe na Korsou ta wordu papia di un aumento di e kantidat di persona ku ta bira grandi. E grupo aki tin mas riesgo pa desaroya malesa kroniko manera demensia. Un porsentahe di 70 % di e grupo ku tin demensia tin e demensia tipo Alzheimer. Hopi biaha esaki ta kuminsa ku problema chikitu di memoria, e persona ta bira menos aktivo i por ripara ku e ta reakshona menos lihe. E difikultat nan aki ta hopi paresido ku e difikultatnan ku por eksperiensia dor di e envehesimentu normal. Un diferensia grandi ta ku e problemanan relashona na un demensia ta progresivo i ta aumenta den intensidat.

Diferente fase di demensia

E malesa ta dura mas of menos 7 aña despues ku tin un diagnosis, esaki ta un promedio. E manera ku e malesa ta desaroya ta diferente pa kada persona, pa un persona esaki por ta 2 aña i pa otro por ta 15 aña. Aunke e malesa ta pa kada persona diferente por distingui 3 fase den e malesa aki.

E prome fase: problema kognitivo

Lubidamentu, desorientashon, kambio den personalidat i un kambio den e velosidat ku ta reakshona ta mayoria biaha e prome señal di un malesa Alzheimer. Hopi biaha e persona ta manera sin smaak, menos spontan i ta slow den mantene informashon nobo. Den e fase aki e persona ta kapas di funshona independiente sigur na momentu ku ta trata di abilidatnan mas simpel. Pero mayoria biaha nan mester toch di sierto guia verbal. Por ripara ku e ekspreshon verbal ta bira menos. Hopi biaha e persona mes ta trata di kamufla e difikultatnan aki. Pa nan mes por ta un iritashon of sufrimentu pa eksperiensia ku tin difikultat.

E di dos fase

E difikultatnan ta visibel i por nota durante e funshonamentu ku e persona ta eksperensia problema. E memoria pa informashon resien ta hopi afekta siendo ku e memoria pa informashon di pasado ta basta bon manteni ainda.

E di tres fase

Durante e ultimo fase aki e malesa a bai ku parti grandi di e personalidat i kapasidat di e patient. Pa e por sobrevivi e persona mester di kuido durante henter dia. Banda di e sintomanan kognitivo awor tin tambe hopi problema fisiko, por ehempel inkontinensia, difikultat pa mobilisa, difikultat pa kauw y guli, e persona tin mas riesgo pa pulmonía i otro infekshon, e halamentu di rosea ta duna difikultat, esaki vooral serka persona ku ta riba kama henter dia. Inevitablemente esaki nan tur ta kondusi na e fase final di e persona su bida, kaminda kuido palliativo ta nesesario.