Biramentu di kabes por tin diferente motibu

Mayoria di nos a jega di sinti loke den boka di pueblo ta jama "biramentu di kabes". E ta un sintimentu komo sifuera bo ta bai flou, bo ta sinti bo instabil, ku perdida di balansa. Mayoria kaso di biramentu di kabes no ta serio i nan ta ser resolve rapidamente di nan mes i nan ta fasil pa trata.

Kousanan

Biramentu di kabes ta surgi na momentu ku no tin sufisiente sanger ta bai na bo selebre. Esaki por sosode si tin un kaida rapido di preshon di sanger, of si bo ta deshidrata dor di vomito, diarea, keintura of otro kousanan.

Hopi hende, spesialmente ora nan ta bira mas grandi, ta eksperensia biramentu di kabes si nan lanta muchu lihe fo'í nan kama of for di nan stul. Kondishonan mas serio ku por kondusi na biramentu di kabes ta ensera problemanan ku kurason (manera ritmo apnormal di kurason of atake di kurason), atake di selebre i preshon abou.

Biramentu di kabes hopi biaha ta bini huntu ku otro sintomanan manera, dolo den pechu, batimentu di kurason, perdida di abla of bo no por mira bon. Tambe gana di saka i halamentu di rosea rapido.

E kousa mas komun di biramentu di kabes ta un posishon robes (benign positional vertigo). E problema aki ta surgi na momentu ku bo kambia posishon di bo kabes. E problema aki normalmente ta sigui despues di un periodo di grip of ferkout i ta ser kousa dor di un infekshon viral parti paden di bo orea.

Malesa di Meniere ta un otro problema komun di den orea. E ta kousa biramentu di kabes, perdida di balansa i fluitmentu den orea. Un biramentu di kabes menos komun i sintimentu di instabil por ta un señal di atake di kurason, multiple sklerosis, un tumor den kabes of sangramentu di selebre. Bou dje kondishonan ei, otro sintomanan normalmente ta akompaña e desbalanse.

Un persona ku sa haña e problema aki di biramentu di kabes frekuentemente mester evita kambiamentu di posishon lihe.