Dengue...

Kiko ta Dengue

Dengue ta un malesa ku ta wordu transmiti pa e sangura Aedes aegypti. Nan ta e sanguranan ku patanan pretu ku strepi blanku. Nan ta pika hende durante dia, mas tantu den oranan trempan di mainta i lat atardi.

Sintoma;

• Keintura haltu (39 grado of mas)

• Dolor di kabes, wowo, lomba, wesu

• Hopi dolor di kurpa

• Rash (uitslag roos)

Un kombinashon di 2 of mas sintoma ku keintura haltu por ta un sospecho di Dengue.

Infekshon

Tin 4 tipo di Dengue pero no ta eksisti diferensha den gravedat entre e 4 tiponan di e malesa, por haña kada un di e tiponan un solo biaha. Kada biaha ku un persona haña un infekshon nobo di Dengue su riesgo pa haña komplikashon ta aumenta. E malesa di Dengue ta manifesta su mes despues di 5 pa 6 dia ku e sangura, infekta ku e virus, a pika un persona. Durashon di Dengue ta 6 pa 7 dia. Ta durante e periodo aki ku transmishon di e virus di Dengue ta tuma luga di un persona infekta, via un sangura, pa otro persona. Mas sangura tin, mas lihe nan por pika un persona ku tin dengue i e sangura ta keda infekta. Asina masha lihe e virus ta pasa pa mas persona i e malesa ta plama na kas, den bisendario, te asta bario.

Kiko pa Hasi ora bo tin Dengue?

• Tuma sufisiente sosiegu

• Bebe hopi likido, speshalmente awa

• No bebe of kome nada ku kontenido sitriko (apelsina, lamunchi, kiwi, grapefruit, mandarin, etc.)

• Drumi bou di net pa evita mas pikadura

• Si ta posibel keda den airko

• Bisti paña manga largu i karson largu pa evita ku por haña mas pika

• Semper konsulta ku bo dokter di kas of botikario prome ku bebe kualkier remedi

Preveni Dengue

Si no tin sangura Aedes aegypti, no tin transmishon. Proteha bo mes kontra pika di sangura usando repelente kontra sangura (ku ta kontene DEET), mecha pa kore sangura, muskita mat, drumi bou di musketero.

Preveni Dengue dor di elimina e sangura Aedes aegypti i tur luga kaminda e por broei, den kura, paden i rond di kas, den bisendario i ora bai ku vakantie.

LUGA KU E SANGURA AEDES AEGYPTI POR BROEI (KRIADERO) DEN KURA:

• Bari of hember ku awa. Tapa bari of hember ku awa ku sefta of paña.

• Tire. Si bo no ta use mas, bente afo of bora e tire.

• Bari di sushi. E bom di e bari mester ta bora, pa awa no para aden.

• Baki ku awa pa bestia di kas, manera kacho, para, pushi, etc. Kambianan awa di bebe tur dia i laba e baki bon pa destrui e webunan di sangura.

• Septic tank: Basha kerosin aden 1 biaha pa luna. Perkura pa e tin un tapa di skroef (pvc). E tubu di eskape mester ta tapa ku sefta.

• Goot di dak. Mantene goot limpi i e goot mester tin un bahada, pa awa no keda para.

• Otro resipiente ku ta wanta awa manera scoter of baki bou di pochi mata (jene ku santu of no use mes)

• Bleki i boter boka habri: deshasi di nan si nan no ta den uso.

• Fontein den kura: pone piska aden.

• Artefakto i opheto ku no ta den uso: warda of tapa nan. Tapa wasmashin, stoof, frigidaire i koi hunga den kura ku no ta den uso mas.

• Buraku koba na unda awa por keda para. Jena e burakunan ku tera.

• Hol of burako den mata. Yena burako den mata ku santu of sement.

PADEN I RONT DI KAS:

• Vas ku mata of flor den awa. Kambia awa di e vas kada 2 of 3 dia. Hasi e vas bon limpi, speshalmente na e rant kaminda e awa a para. Ta importante pa laba stengel i rais di e flor of mata ku tabata den e vas.

• Baki di awa bou di frigidaire. Hasi e baki limpi 2 biaha pa siman.

• Baki di awa bou di airko. Pone tubu pa laga e awa di kondensashon bai pa mata.

• Drainer di awa ku no ta regularmente den uso. Pone un kuchara di salu den dje of tape ku su dopi (plug).

• Baki bou di e reki di koi kibra. Basha e awa afo tur dia.

Bo Tabata sa ku?

• Aedes aegypti ta biba mas of menos 30 dia.

• Nan mester di sanger pa produsi webu.

• Nan por pone 100 webu kada biaha, esaki ta 100 sangura mas!

• Nan webunan por keda bon pa un aña sin awa.

• Nan ta krese den awa limpi ku a keda para pa mas ku 2 dia.