Droga Legal....

Droga ta kualkier substansia ku na momentu ku e drenta e kurpa di e ser humano e ta kambia e funshonamentu di e mente/seleber. Droga ta kambia e manera ku un hende ta: Papia, Pensa, Sinti, Hasi. Tin diferente tipo di droga na mundo. Droganan LEGAL (permiti pa lei ) i droganan ILEGAL (prohibi pa lei) DROGANAN LEGAL - Remedinan p.e. Remedinan di tosamentu, remedinan ku ta kita dolor - Alkohol, p.e. Serbes, Whisky, Vodka, Rom, Biña - Tabako, p.e. Sigaria. Siga, Tabako di kauw, Shag Remedinan Remedinan ta droganan ku nos tin ku usa ora nos realmente mester di nan por ehempel ora nos bira malu. Komo ku remedinan ta kontene kimiko (tin biaha fuerte) esakinan por afekta sierto organonan di hende, speshal di muchanan. Pa motibu ku un mucha su kurpa konstantemente ta den desaroyo, i su organonan ta kresiendo i fortifikando, e mester tene extra kuidou ora di usa remedi, pasobra esaki lo por afekta su organonan ku ta den desaroyo, i esaki por kausa daño na nan. Ta hopi peligroso pa usa un remedi si nos no mester di esaki realmente. Asina ku nos bira bon nos mester stop di usa e remedi pasobra nos kurpa ora e ta sano no mester di remedi. Tambe ta hopi importante pa ora nos hanja un remedi nos lesa hopi bon kiko tin para riba e papel (bijsluiter) ku ta bini ku e remedi. Tin remedi ku por dunabo soño, biramentu di kabes of stoma. Tin biaha nos kurpa no ta bai ku un remedi ku dokter duna nos i e ora nos kurpa mesora ta protesta. E ora nos tin ku pidi dokter pa kambia e remedi pa nos. Semper lesa bon kuantu di e remedi nos tin ku tuma diariamente. P.e. si ta para ku bo tin ku tuma kada bes 10 ML. di un remedi, tuma estriktamente esei kada biaha. Absolutamente no tuma mas ku esaki. E apotheker ta pone esaki riba e boter pasobra e sa ku si bo tuma mas ku esei e por kousa daño. Pesei mester respeta semper lokual tin pone riba e boter. Korda semper ku remedinan ta kimikonan peligroso si bo no usanan komo debe ser. Tin biaha nan ta pone un smaak dushi, por ehempel un smaak di fruta den e remedinan pa asina e mucha bebe esaki mas lihe pero esaki no kiermen ku ta kos dushi e ta. Tambe ta hopi peligroso pa usa remedi di otro hende, pasobra tur hende ta diferente. Podise bo kurpa no ta asepta e remedi di otro hende, e ora ei enbes di bira bon bo por bira mas malu.

Alkohol Alkohol ta un droga ku ta kambia e personalidat di un hende ora e abusa di dje. Alkohol tambe ta kontene kimiko. E kimiko aki jama ether. Ether ta un kimiko ku ta wordu usa pa manda hende flauw. Pesei ora un hende bebe alkohol, su kabes ta kuminsa bira, su stoma ta kuminsa bira i si e bebe hopi hopi e por kai flauw. Ta ether ta okashona esaki. Ether ta un kimiko ku ta smaak masha masha marga mes. Hopi biaha e smaak hopi marga aki por wordu sinti den p.e. Whisky, Rom i Vodka. Pero tin hende sabi i pa hasi hende, speshalmente muchanan kere ku alkohol ta dushi nan ta hinka smaaknan dushi den esaki p.e. tin hopi biñanan ku ta kontene hopi suku of liquernan ku tin un smaak hopi zoet. Esaki ta pa kita e smaak di ether ku tin den alkohol. Pero ta solamente e smaak nan ta kambia. E ether mes ta keda aden i tambe por kousa daño. Meskos ku remedinan, alkohol tambe ta peligroso pa e organonan di e ser humano, speshalmente e organonan di muchanan. Pesei mes alkohol no ta kos pa mucha. Pa e motibu ei Gobiernu tin leinan ku ta prohibi hende bende muchanan alkohol. Pasobra muchanan mester kuida nan organonan ku ta den desaroyo i ku ta kresiendo ainda i alkohol (ETHER) por stroba esaki. Tambe alkohol por kousa daño na e seleber di e ser humano. Un hende ku usa alkohol pa hopi tempu por kuminsa perde memoria i lubida sierto kosnan. Tambe e por haña problema ku su nervionan. E por afekta su habla (forma di papia). Tambe e por kousa daño hopi inmenso na su higra. Abusu di alkohol por afekta e higra di tal forma ku e persona ta haña e malesa di higra ku jama scirrosis i ta muri. Alkohol tambe ta un droga ku ta hasi ku e kurpa ta bira dependiente na dje ku tempu.

TABAKO Tabako, Sigaria, Siga ta kontene nikotina. Nikotina ta un kimiko ku ta afekta e sistema di garganta i pulmon severamente. E por kousa brongitis pisa i kanser na pulmon ku por kousa morto. Nikotina tambe ta un droga ku ta hasi ku despues di tempu e kurpa ta bira dependiente na dje i ta sumamente difisil pa siña biba bek sin e nikotina. Sigaria ta wordu konsidera un droga ku ta habri e porta pa muchanan bai usa droganan mas fuerte. Komo ku e kurpa di e ser humano ta pidi kada dia mas i mas di e droga, ta jega un momento ku e persona ta bai usa otro droganan mas fuerte pa haña e mesun efekto.