Kanser - Kiko bo por hasi pa proteha bo kurpa?

Hende i kanser

Tur aña demasiado hende ta muri di kanser. Kanser di pulmon, di prostat, di tripa of di rekto i kanser di testikulo ta e tiponan di kanser mas frekuente serka hende homber. Si deskubri kanser trempan (haña sa mas pronto ku ta posibel ku den bo kurpa tin un kanser ku ta kresiendo) bo tin un miho chens di kura. Bo dokter por kontesta bo preguntanan relashona ku kanser i por laga samina bo. Si bo tin entre 20 i 40 aña, ta nesesario laga samina bo kurpa kada 3 aña. Pa hende muhe ta nesesario hasi paptest tur aña. Asina bo kumpli 40 aña bo mester laga samina bo kurpa tur aña.

Kanser di kueru

Algun echo; Mas kla un hende su kolo ta, mas chens e tin di haña kanser di kueru. Melanoma ta un forma serio di kanser di kueru. Bon notisia; Kanser di kueru kasi semper ta kurabel.

Sea alerta i evita;

• solo entre 10or di mainta i 3or di atardi

• bisti paña i un sombre ku ta proteha bo kontra rayonan dañino di solo

• huntu bo kurpa ku krema of loshon di spf 15 kontra solo (sunblock)

• mayoria biaha ta hende homber ta haña kanser di kueru

• ora dokter samina bo un biaha pa aña, lage kontrola bo kueru di kurpa tambe.

Bai dokter, si un skupi di Dios, un fret of kualke otro mancha riba bo kueru kuminsa kambia di forma of kolo.

Kanser di pulmon

• 3 di 4 hende ku haña kanser ta humado di sigaria

• e ta e tipo di kanser mas mortal

• lastimadamente ku un portret di pulmon lo no avisa semper na tempu

• 9 di 10 hende ku muri di kanser di pulmon ta humado di sigaria

Bon notisia; si bo stop di huma na tempu, mayoria di daño ku e humamentu a kousa lo disparse. Esun ku no ta huma ta preveni hopi enfermedat i no solamente kanser di pulmon.

Sea alerta: ningun sigaria no ta "safe". No huma, anto prinsipalmente no hasi esei si bo ta traha ku asbest of supstanshanan venenoso. Tanten ku bo no logra stop di huma en todo kaso huma menos i solamente sigaria ku un nivel abou di ter i nikotina.

Evita produkto di tabako (foya di tabako, sneif) i keda leu for di hende ku ta humando.

Bai dokter si:

• bo tin un tosa permanente of doloroso ku no ke pasa

• bo ta skupi sanger

• kontinuamente bo pechu ta hasi due

Kanser di tripa i di rekto

Algun echo; mayoria bia e ta afekta hende homber riba 50 aña. Bon notisia; diagnosis na tempu por salba bida di 4 di 5 hende afekta.

Mayoria biaha e ta afekta hende homber:

• ku kolitis ulserativo

• ku tin den famia hende ku kanser di tripa of rekto

• ku tin hende den famia ku polip na tripa

• ku a kumpli 40 aña, pesei laga samina bo rekto tur aña

• ku a kumpli 50 aña, pesei puntra dokter ki test e ta konsidera nesesario

Bai dokter si:

• bo ta sangra na bo rekto

• bo mira sanger den bo shushi

• bo nota kambio di frekuensha di bai af

• bo ta sinti kram doloroso den bo barika

Kanser di pechu

Algun echo; e ta un di e tipo di kansernan mas mortal, ku ademas ta kobra mas tantu bida. Mayoria biaha ta trata di hende muhe;

• ku a kumpli 50 aña

• ku tin den famia hende ku kanser di pechu

• ku nunka no a haña ju

• ku a kumpli 30 aña dia nan a haña nan prome yu

Bon notisia; di 10 hende muhe ku haña kanser di pechu, 9 por sobrebibi.

Sea alerta;

• samina bo pechu tur luna (si bo edat ta entre 20 pa 40 anja)

• laga dokter samina bo pechu tur aña (si bo edat ta entre 40 pa 50 anja)

• laga hasi un mamogram tur aña of kada aña pasa (si bo edat ta 50 of mas)

Bai dokter si; diskubri un pipita of otro kambio manera; duek, vocht for di e pechu, dolo,of mancha na un pechu.