Tene bo kolesterol bou di kontrol!

Kolesterol Haltu

Bo no por tende ni sinti'e. E no ta buta bo sinti malu. Asta bo por ta sinti bon. Pero si bo kolesterol bini kuchi kuchi i alkansa un nivel muchu haltu, e ta oumenta bo riesgo di ataka di kurason, ataka di seleber i otro enfermedatnan kardiovaskular. Kombina kolesterol haltu ku otro faktornan di riesgo den famia manera diabetis of faktornan eksterno manera humamentu, por hasi un homber riba 45 aña i muhenan riba 45 aña jega riba un nivel hopi mas riskante. Pesei bo mester sa kiko ta kolesterol i tene bou di kontrol.

Kiko ta kolesterol ?

E tarea mas importante di kolesterol; ta juda transporta vet dor di bo arterianan. Komo ku vet riba su mes no por kore den bo ardunan (vet no por meskla ku awa i awa ta e ingrediente mayor di sanger). Normalmente e sistema di transporte aki ta funshona bon, pero ora kome demasiado vet i bo kurpa mester transporte pa hibe tur parti di kurpa, por sosode ku muchu kolesterol ta akumula. Problema serio manera atake di kurason por ta e konsekuensha. Bo kurpa mayormente ta dirigi e vet di bo kuminda i ta mande bo higra, kaminda ta prosese pa despues distrubui'e. Bo higra na su luga ta traha kasi tur kolesterol ku bo kurpa mester pa juda transporta e vet pa otro partinan di bo kurpa.

Di unda kolesterol ta bini ?

Bo higra ta traha mayor parti di bo kolesterol, pa juda transporta vet pa tur parti di bo kurpa ku mester di vet, pa energia i reparashon of e ta hiba e vet bai deposite na algun luga; manera na bo kustia i/o barika. Parti di e kolesterol den bo kurpa ta bini di kuminda ku hopi kolesterol manera webu, rabu, porkchop, fastfood etc.

Tipo di kolesterol

Bo higra ta paketa kolesterol den e asina yama lipoproteina, ku ta un kombinashon di vet, kolesterol i proteina. Ta eksisti tres sorto di pakete di lipoproteina: VLDL (Very Low Density Lipoprotein) lipoproteina di densidat masha abou. LDL (Low Density Lipoprotein) lipoproteina di densidat abou; i HDL (High Density Lipoprotein) lipoproteina di densidat haltu. Kada un tin un otro tarea den bo kurpa.

VLDL: ta transporta vet di bo higra pa partinan di bo kurpa. VLDL ta bira LDL despues ku e deposita e vet.

LDL: ta miho konosi komo e "kolesterol haltu" of "kolesterol malu", parti di dje fasilmente ta keda pega parti paden di bo arterianan.

HDL: ta miho konosi komo "kolesterol bon" komo ku e ta pasa kohe i reskata pidanan di LDL ku keda pega den e arterianan i hiba nan bo higra bek.

Kon kolesterol ta funshona?

Kolesterol ta juda transporta vet ku bo higra a digeri i e ta distrubui'e pa hinter bo kurpa, usando bo arterianan komo via di transporte. Despues di entrega e vet, kolesterol ta bolbe bai bo higra i su tarea ta bolbe kuminsa.

• Vet ta bai na higra! Ora bo kome vet, e ta bai bo stoma, kaminda ta digeri'e i ta absorbe den bo tripanan i ta mande pa bo higra prosese i depues distribui'e pa hinter bo kurpa.

• Higra ta deposita vet den VLDL i esaki ta transporta e vet via di bo arterianan pa tur parti di bo kurpa. Ora e VLDL kaba di deposita e vet, e ta bira LDL.

• Algun pida LDL por keda pega den bo arterianan i asina pasashi dor di e arterianan ta bira mas smal.

• HDL ta reskata e pidanan di LDL ku keda pega i ta hiba nan higra bek i bo higra ta sea resikla e pidanan di bo LDL i konberti nan den VLDL nobo, of e ta kimanan i sakanan for di bo kurpa.

• Si bo kome muchu vet, bo higra ta traha VLDL extra pa transporta. Mas pida di LDL ta keda pega i si no tin basta HDL pa reskatanan esaki lo verstop bo arterianan. Si esaki sosode den un arteria na bo kurason, esei por resulta den un ataka di kurason.