Liposuction no ta pa baha di peso

Awendia liposuction ta e intervenshon magiko pa laga bo lusi un kurpa perfekto?!

Kiko ta liposuction?

Liposuction (of chupa vet) ta un operashon unda ku ayudo di kortanan masha chiki, pipanan ta keda trese bou di e kueru pa chupa vet. “Lipo” ta vet i “suction” ta chupa. Pues e palabra liposuction ta nifika chupa/kita vet dimas.

E kantidat di vet dimas ku ta akumula bou di kueru, ta depende di loke ku bo kome. E vet-sel ku tin den kurpa ta konstante. Si bira gordo, vet-selnan ta bira grandi i ta bira “opslagcellen” (selnan ku ta warda vet). Pues tur lokual ku kome poko di mas, ta keda “warda” komo vet den un vet sel. Pues no ta haña mas vet-sel, sino esnan ku tin ta bira mas grandi. Pesei hende ta bira gordo, pasombra e vet selnan ta bira grandi ku vet aden.

Liposuction no ta pa baha di peso

Liposuction no ta pa baha di peso. Liposuction ta pa kita vet for di sierto parti di kurpa ku a akumula i ku no por perde ni ku dieta of hasiendo ehersisio. Den kaso ku tin peso dimas, mester baha un kantidat di kilo prome ku bai over na chupa vet. Kaminda abo ta haña ku tin vet dimas, por chupa esaki.

E meta di liposuction ta ku ta trata di drecha bo kurpa. Por ehempel den kaso di un hende muhe di kual su kurpa parti ariba ta normal, pero abou si ta hanchu por ehempel zeinan hanchu, belnan di pia gordo, belnan di pia parti paden ku ta pega na otro.

Dor di algun korta chiki di 3 te ku 5 milimeter, ta saka e vetnan grandi afo for di e area nan meshona.

Un bida salu

Hopi biaha ta trata tur sorto di dieta pa baha di peso, no ta kome esaki of esaya. Pero no ta bai pa e dieta sino henter e manera di bida ku mester kambia. Hende no ta kome salu, nan no ta biba salu, ta move menos i no hasi ningun otro tipo di moveshon manera deporte. E kos no ta solamente di bai serka un dietista i disidi ku no ta kome esaki of esaya.

E hende mester kambia su forma di bida, baha di peso i keda stabil ku e peso. Si hasi esaki, bo sanger ta bira bon, suku ta keda bon, henter bo salu ta keda bon. Si tog sobra vet na algun parti di kurpa ku tog no kier bai, manera na bel di pia, parti paden di pia, e parti di barika den banda of zei, e ora ei por pensa pa redusi e vet dor di chupa esaki.

Liposuction tin risiko?

Kada operashon tin risiko kune. E promedio di persona ku ta salu, e risiko ta masha minimal. Pero e risiko ku semper tin ta ku e anestesia. Ora tin di bai drumi dje anestesia por haña walmentu di stoma. Tambe por haña infekshon di pulmonnan pa motibu di e gas ku ta ingeri.

E risiko por ta sinta mas ora e liposuction no keda bon. E falta di simetria, kaminda ta haña un banda ta keda ku mas tantu vet ku e otro. E ora ei mester hasi un operashon nobo pa drecha esaki ku tur su konsekuensia i risikonan.