"Peno-pousa" ta eksisti di berdat?

Ta parse ku hende hombernan di edat mediano ta pasa atrabes di algu ku ta ser yama e krisis di edat mediano. Pa basta tempu kaba e fenomeno aki di stres fisiko i sintomanan emoshonal a bin ta ser kompara ku menopousa femenino. Den boka di pueblo nos a bin yam'e "penopousa".

Pero penopousa ta eksisti di berdat?

Homber no por haña nan mes den un menopousa, ya ku e difinishon di menopousa ta e periodo den kual periodonan di mentruashon ta para. Sinembargo ta ser bisa ku hende homber tambe ta pasa den un periodo ekivalente pa homber, yama andropousa, ku ta akompaña pa sintomanan similar na esnan ku hende muhenen ta eksperensia. Ta ser pretende ku andropousa tin relashon ku hormon, meskos ku e menopousa femenino. No opstante ku e menopousa femenino ta ser stimula dor di bahada drastiko den e nivel di hormonanan femenino, e bahada di nivelnan di hormon maskulino, testosteron, si ta sosode muchu mas gradual atrabes di añanan. Hopi hende homber di 70 aña tin nivelnan di testosteron similar na hobenan di 20 aña.

Kon hombernan ta ser afekta?

Kehonan komun ku hombernan di edat medio tin ta e.o. tiki stimulashon seksual, kansansio, rekonosementu di edat, perdida di kabei i kambionan den forma di kurpa, ya ku nan ta bira menos muskular i mas rondo. Otro sintomanan ta inklui: e ta bira irita masha lihe, ta soda hopi, sinti kalor, sinti dolo kalkue kaminda na kurpa, un tiki malbeis i asta tin biaha depreshon. Si bo analisa e sintomanan ei, ta masha fasil pa hasi un komparashon ku e menopousa femenino. Hende muhenan lo por eksperensia tur sintomanan aki.

Otro kousanan....

Hopi dokter i otro ekspertonan ta rekonose ku tin kambionan ta surgi serka e hende homber, pero nan ta kere tambe ku e tin un base sikologiko na luga di unu hormonal. E realisashon ku nan a laga nan hubentut atras ta ser mira ku señalnan di ploi, kabei blanku, kabes limpi i un kurpa ku vet. Tin hopi hende homber ku a bai leu i progresa den nan karera, pero e periodo aki ta unu ku ta duru pa asepta. Mientras ku nan yunan ta krese i bandona kas, hopi ta puntra si ainda nan tin nan rol di hunga den famia.

Problemanan matrimonial

Problemanan matrimonial, desatisfakshon den trabou, problemanan finansiero of mal uso di alkohol por ta algun dje otro motibunan tras di loke un homber ta sinti. Ta ser aksepta ku kambionan fisiko ta un parti normal di e proseso di embehesimentu, e ora ei esaki ta permiti pa e sintomanan emoshonal sostene un base sikologiko pa e kambio maskulino den bida. Pero ta importante pa no lubida ku, meskos ku hende muhenan, otro malesanan fisiko lo por ta resposabel pa e mesun grupo di sintomanan i ku nan mester ser investiga. Algun di nan por ta anemia i depreshon.

Tratamentu

Si e kousa ta andropousa, ketu bai ta diskutiendo si mester ofrese testosteron of terapia di remplaso hormonal. Esaki ta optenibel den forma di pleister, angua of tablet, i hopi hende homber ku a sigui tratamentu a bisa ku nan a mira progreso den nan sintomanan. Sinembargo nunka a keda demonstra si ta pasombra a aplika e terapia di remplaso hormonal. Tene na kuenta si ku e tipo di terapia aki ta ser relashona ku desaroyo di kanser di prostat, pues kualke tratamentu mester ser di monitor.